இந்தியா – பாகிஸ்தான் இடையே நல்லுறவை ஏற்படுத்தும் பேச்சுவார்த்தைக்கு தயாராக இருப்பதாக பிரதமர் நரேந்திர மோடி பாகிஸ்தானின் புதிய பிரதமர் இம்ரான் கானுக்கு கடிதம் மூலம் தெரிவித்துள்ளார்.
பாகிஸ்தான் நாட்டின் புகழ்பெற்ற கிரிக்கெட் வீரரான இம்ரான் கான் கடந்த 17ஆம் தேதி அந்நாட்டின் 22வது பிரதமராக பதவி ஏற்றார். ஞாயிற்றுக்கிழமை முதல் முறையாக உரையாற்றிய இம்ரான் கான், அனைத்து அண்டை நாடுகளுடனும் நல்லுறவை பேண நடவடிக்கை எடுப்பதாக உறுதி அளித்துள்ளார்.
இந்நிலையில், பாகிஸ்தான் பிரதமராக பதவியேற்ற இம்ரான் கானுக்கு இந்தியப் பிரதமர் நரேந்திர மோடி தொலைப்பேசி மூலம் தொடர்புகொண்டு வாழ்த்து தெரிவித்தார்.
தொடர்ந்து ஆகஸ்ட் 18ஆம் தேதி மோடி இம்ரான் கானுக்கு கடிதம் ஒன்றை எழுதியுள்ளார். இக்கடிதத்தில் இம்ரானுடனான தொலைப்பேசி உரையாடலை நினைவுகூர்ந்திருக்கும் மோடி, இந்தியத் துணைக் கண்டத்தில் அமைதி, பாதுகாப்பு, செழிப்பு ஆகியவற்றை உறுதிசெய்யவும் பயங்கரவாதம் மற்றும் வன்முறை ஆகியவற்றை ஒழித்து வளர்ச்சிக்கான பாதையில் கவனம் செலுத்தவும் தங்களது கருத்துகளைப் பகிர்ந்துகொண்டதை குறிப்பிட்டிருக்கிறார்.
இதற்காக பாகிஸ்தான் அரசுடன் ஆக்கப்பூர்வமான மற்றும் அர்த்தமுள்ள பேச்சுவார்த்தை நடத்த தயாராக இருப்பதாகவும் பிரதமர் மோடி தன் கடிதத்தில் தெரிவித்துள்ளார்.
“நம் அண்டை நாட்டு தலைவர்கள் அனைவருடனும் பேசியுள்ளேன். நம் அண்டை நாடுகளுடன் அமைதியான நல்லுறவை ஏற்படுத்திக்கொள்ளாமல் நம் நாட்டில் அமைதியை நிலைநாட்டுவது இயலாது.” என இம்ரான் கான் தனது முதல் உரையில் வலியுறுத்தியுள்ளதும் இந்தியா – பாகிஸ்தான் இடையேயான உறவு வலுப்படும் என்பதற்கான நம்பிக்கையை அளிப்பதாக உள்ளது.
மேலும், ஜூலை 25ஆம் தேதி தன் கட்சியினரிடம் பேசிய இம்ரான் கான், “பாகிஸ்தான் இந்திய அரசுடன் உறவை மேம்படுத்திக்கொள்ள தயாராக உள்ளது. இருநாட்டு தலைவர்களும் பேச்சுவார்த்தை மூலம் காஷ்மீர் பிரச்னை உள்ளிட்ட அடிப்படைப் பிரச்னைகள் முதல் அனைத்து விவகாரங்களிலும் தீர்வை எட்ட வேண்டும்.” என்று கூறியிருக்கிறார். இதற்காக, “நம்மை நோக்கி அவர்கள் ஒரு அடி முன்னெடுத்தால், நாம் இரண்டு அடி முன்னெடுத்துச் செல்வோம். ஆனால் இதற்கு குறைந்தபட்சமாக ஒரு தொடக்கம் தேவை.” எனவும் தெரிவித்துள்ளார்.
