நக்கீரன் கோபாலை நீதிமன்றக் காவலில் வைக்க நீதிமன்றம் அனுமதி மறுத்துள்ளதுடன் அவரை விடுதலை செய்ய வேண்டுமெனவும் அதிரடியாக உத்தரவிட்டுள்ளது.
சென்னை விமான நிலையத்தில் நக்கீரன் கோபால் இன்று(09) காலை கைது செய்யப்பட்டார். நிர்மலா தேவி விவகாரத்தில் ஆளுநரைத் தொடர்புபடுத்தி கட்டுரை எழுதியதால் அவர் மீது தேசத் துரோக வழக்குத் தொடரப்பட்டுள்ளது.
இதனைத் தொடர்ந்து இந்து பத்திரிகையாளர் ராம் எழும்பூர் நீதிமன்றத்தில் வழக்குத் தொடர்ந்தார். இது தொடர்பாக நடந்த விவாதத்தில் நக்கீரன் கோபால் மீது நடவடிக்கை எடுக்குமாறு புகாரில் ஆளுநர் தெரிவிக்கவில்லை.
ஏப்ரல் மாதம் வெளியான கட்டுரை தொடர்பாக தற்போது கைது செய்தது முறையல்ல என நக்கீரன் தரப்பு வழக்கறிஞர் வாதிட்டார்.
மேலும், மூத்த பத்திரிகையாளர் இந்து ராமும் இது தவறான முன்னுதாரணம். இது தொடர்ந்தால் நாடெங்கும் பத்திரிகையாளர்கள் மீது வழக்குத் தொடர்வார்கள் எனவும் தெரிவித்துள்ளார்.
இதனைத் தொடர்ந்து தீர்ப்பு வழங்கிய நீதிபதி கோபிநாத் “ 124 பிரிவின் கீழ் நக்கீரன் கோபால் கைது செய்யப்பட்டதில் முகாந்திரம் இல்லை. அவரை நீதிமன்ற காவலுக்கு அனுப்ப முடியாது” எனக்கூறி நக்கீரன் கோபாலை அவர் விடுதலை செய்து உத்தரவிட்டார்.
இதன் பின்னர் செய்தியாளர்களிடம் பேசிய கோபால் “நீதிமன்றம் கருத்துச் சுதந்திரம் பக்கம் நின்றமையால் நான் விடுதலை அடைந்தேன்” என்றார்.
