துலாம் ராசியில் சூரியன், சுக்கிரன்,விருச்சிகத்தில் குரு,புதன், தனுசு ராசியில் சனி, கடகத்தில் ராகு, மகரத்தில் கேது செவ்வாய் சேர்க்கை என கிரகங்களின் சஞ்சாரம் அமைந்துள்ளது. நவம்பர் 6 ஆம் தேதி முதல் செவ்வாய் கும்ப ராசிக்கு இடப்பெயர்ச்சி அடைகிறார். இந்த வாரம் சந்திரனின் சஞ்சாரம் சிம்மம், கன்னி, துலாம், விருச்சிக ராசி வரை உள்ளது. மகரம், கும்பம், மீனம், மேஷம் ராசிக்காரர்களுக்கு சந்திராஷ்டமம். மேஷம் முதல் மீனம் வரை 12 ராசிக்காரர்களுக்கும் பலன்கள் எப்படி என பார்க்கலாம்.
இந்த வார ராசி பலன்கள் (02-11-2018 முதல் 08-11-2018 வரை)
கிரகங்களின் சஞ்சாரம்
சூரியன் : துலாம் ராசியில் சூரியன்
செவ்வாய் : மகரம் ராசி 6 ஆம் தேதிக்கு மேல் கும்ப ராசி
புதன் : விருச்சிகம்
குரு : விருச்சிகம் ராசி
சுக்கிரன் : துலாம் ராசி
சனி : தனுசு ராசி
ராகு : கடகம் ராசி
கேது : மகரம் ராசி
சந்திரன் சஞ்சாரம்
02-11-2018 சிம்மம் ராசியில் சந்திரன் சஞ்சாரம் உள்ளது
03-11-2018 கன்னி ராசியில் சந்திரன் சஞ்சாரம் தொடங்குகிறது
06-11-2018 காலை 8.12 மணிக்கு துலாம் ராசியில் சந்திரன் சஞ்சரிக்கிறார்
08-11-2018 பகல் 1.42 மணிக்கு சந்திரன் விருச்சிக ராசியில் சஞ்சரிக்கிறார்
மேஷம்:
வீர பராக்கிரமம் கொண்ட மேஷ ராசிக்காரர்களே… இந்த வாரம் உங்கள் ராசிக்கு ஏழாவது வீட்டில் சூரியன், சுக்கிரன் சஞ்சாரம் உள்ளது. வீட்டில் மகிழ்ச்சிக்கு குறை எதுவும் இருக்காது. சந்திரனின் சஞ்சாரம் வார துவக்கத்தில் சாதகமாக உள்ளது. வார இறுதியில் சாதகமற்ற நிலையில் இருக்கிறது. மனக்கலக்கத்தை ஏற்படுத்தும். செவ்வாயின் சஞ்சாரம் பத்தாம் வீட்டில் இருந்து 11ஆம் வீடான கும்பத்திற்கு மாறுகிறது. லாபம் அதிகரிக்கும். புதனின் சஞ்சாரம் குரு உடன் 8 ஆம் வீட்டில் உள்ளது வருமானத்திற்கு குறை எதுவும் இருக்காது. புத்தி சாதுர்யம் அதிகரிக்கும். பாக்ய ஸ்தானத்தில் உள்ள சனி பகவானால் இந்த வாரம் பதவி உயர்வு தேடி வரும். நான்காம் இடத்து ராகு பத்தாம் வீட்டில் உள்ள கேதுவினால் வீட்டிற்குத் தேவையான ஆடம்பர பொருட்களை வாங்குவீர்கள். சுப நிகழ்ச்சிகள் நடைபெறும். நவம்பர் 8 ஆம் தேதி தொடங்கி இரண்டு நாட்களுக்கு சந்திராஷ்டமம் இருப்பதால் கவனம் தேவை. ஆலய தரிசனம் செய்வது நன்மை தரும். அதிர்ஷ்டமான நாட்கள் திங்கள், புதன், வியாழன் ராசியான எண்கள் 3,6.
ரிஷபம்
அன்பும் பாசமும் கொண்ட ரிஷப ராசிக்காரர்களே… இந்த வாரம் ஆறாவது வீட்டில் சூரியன், சுக்கிரன் சஞ்சாரத்தினால் மன சஞ்சலம் அதிகமாகவே இருக்கும். வருமானம் இருந்தாலும் நோய்களினால் செலவுகள் எட்டிப்பார்க்கும். பண்டிகை நாட்களில் பட்டாசு வெடிக்கும் போது கவனம் தேவை. சந்திரனின் சஞ்சாரம் இந்த வாரம் சாதகமாக உள்ளது மன அமைதியை ஏற்படுத்தும். செவ்வாய் பத்தாம் வீட்டிற்கு மாறுகிறார். அலுவலகத்தில் பணிகளில் தடைகள் ஏற்படும். செய்யும் வேலையில் கவனம் தேவை. புதன், குரு ஏழாம் வீட்டில் இருப்பதால் குடும்பத்தில் சாதகமான சூழ்நிலையே நிலவுகிறது. பண்டிகை காலம் குதூகலமாகவே இருக்கும். அஷ்டமத்து சனியின் ஆட்டத்தினால் மனது சஞ்சலமாகவே இருக்கும். யாருடனும் வீண் வாக்குவாதம் செய்ய வேண்டாம். ராகு மூன்றாம் வீட்டிலும், கேது ஒன்பதாம் வீட்டிலும் இருப்பதால் முயற்சிகளில் வெற்றி கிடைக்கும். இந்த வாரம் உங்களுக்கு செவ்வாய், வியாழன். வெள்ளி நன்மை தரக்கூடியது. ராசியான எண்கள் 5,7.
மிதுனம்
அறிவும், புத்திசாலித்தனமும் கொண்ட மிதுனம் ராசிக்காரர்களே… இந்த வாரம் உங்களின் பூர்வ புண்ணிய ஸ்தானத்தில் சூரியன், சுக்கிரன் சஞ்சாரம் உள்ளது. பூர்வீக சொத்துக்களில் இருந்து வருமானம் வரும். விருந்தினர்களின் வருகை நன்மையை ஏற்படுத்தும். சந்திரனின் சஞ்சாரத்தினால் உற்சாகம் அதிகரிக்கும். செவ்வாய் ஒன்பதாம் வீட்டிற்கு மாறுவதால் வீடு, நிலம் வாங்க முயற்சி செய்யலாம். புதன், குரு சஞ்சாரம் ஆறாம் வீட்டில் உள்ளதால் பங்குச்சந்தை மூலம் பணம் கிடைக்கும். நோய்கள், கடன்கள் தீரும். சனியின் சஞ்சாரம் ஏழாம் வீட்டில் உள்ளது. கண்டச்சனியின் சஞ்சாரம் கவனம் தேவை. ராகு கேது சஞ்சாரத்தினால் வருமானம் அதிகரிக்கும். கூடவே செலவும் வரும். இந்த வாரம் உங்களுக்கு ஞாயிறு, செவ்வாய், புதன் நன்மைகள் அதிகம் நடைபெறும் நாட்கள். ராசியான எண்கள் 3, 9.
கடகம்:
ஆழ்கடல் போல அமைதியான குணம் கொண்ட கடகம் ராசிக்காரர்களே… இந்த வாரம் ராசிக்கு நான்காவது இடத்தில் சூரியன், சுக்கிரன் அமர்ந்திருக்கின்றனர். புதிய சொத்துக்களை வாங்க முயற்சி செய்யலாம். வண்டி வாகனங்களை பழுது பார்க்க வேண்டியிருக்கும். சந்திரன் சஞ்சாரத்தினால் வாரம் முழுவதும் மனம் அமைதியாக இருக்கும். செவ்வாயின் ராசி மாற்றத்தினால் மனதில் உற்சாகம் அதிகரிக்கும் என்றாலும் வண்டி வாகனத்தில் செல்லும் போது கவனமாக இருக்கவும். புதன், குரு சஞ்சாரம் ராசிக்கு ஐந்தாவது வீட்டில் இருப்பதால் தாய் மாமன் மூலம் பணம் வருவாய் அதிகரிக்கும். சனியின் சஞ்சாரம் ஆறாம் வீட்டில் உள்ளதால் எதிரிகள் தொல்லைகள் நீங்கும். ராகு ஜென்மத்தில் இருப்பதாலும் கேது ஏழாம் வீட்டில் இருப்பதாலும் காரியத்தடைகள் இருக்கும். அதை கவனமாக கையாளவும். வாரத்தில் செவ்வாய், வியாழன், வெள்ளி நல்ல நாட்கள். ராசியான எண்கள் 5, 8.
சிம்மம்
வெற்றியின் திருமகனாக திகழும் சிம்ம ராசிக்காரர்களே… இந்த வாரம் சாதனைகள் அதிகம் செய்வீர்கள். கிரகங்களின் சஞ்சாரமும் சாதகமாக உள்ளது. ராசி நாதன் சூரியன் மூன்றாம் வீட்டில் சுக்கிரனுடன் சேர்ந்து அமர்ந்து உள்ளார். செய்யும் முயற்சிகளில் வெற்றி கிடைக்கும். சந்திரன் சஞ்சாரம் வார துவக்கத்தில் ராசியில் உள்ளதால் உடல் நலம், மன நலம் பாதிக்கப்படும். செவ்வாயின் சஞ்சாரம் ராசிக்கு 7 ஆம் வீட்டிற்கு மாறுவதால் உற்சாகம் பிறக்கும். சுறுசுறுப்பாக செயல்படுவீர்கள். புதன், குரு சஞ்சாரம் ராசிக்கு 4ஆம் வீட்டில் உள்ளதால் தாய் மாமன் வழியில் சின்னச் சின்ன தொந்தரவுகள் இருக்கும். வீட்டிற்குத் தேவையான பொருட்களை வாங்குவீர்கள். சனியின் சஞ்சாரம் 5ஆம் வீட்டில் உள்ளது. பூர்வீக சொத்துக்களை விற்க முயற்சி செய்யலாம். ராகு கேது சஞ்சாரத்தினால் சுப விரையம் ஏற்படும். சனி, திங்கள், புதன் நல்ல நாட்கள். ராசியான எண்கள் 4,6.
கன்னி
புத்திசாலித்தனம் கொண்ட கன்னி ராசிக்காரர்களே… இந்த வாரம் ராசிக்கு இரண்டாவது வீடான தன ஸ்தானத்தில் சூரியன், சுக்கிரன் சஞ்சாரம் உள்ளது. பண வரவு அதிகரிக்கும். சந்திரனின் சஞ்சாரம் வார மத்தியில் மனக்குழப்பத்தை ஏற்படுத்தும். செவ்வாயின் சஞ்சாரம் நோய்களை குணப்படுத்தும். மூன்றாவது வீட்டில் உள்ள குரு, புதன் செய்யும் முயற்சிகளை வெற்றியடையச் செய்வார்கள். வீட்டில் சுபகாரியம் நடைபெறும். கண்டக சனியின் சஞ்சாரத்தினால் அம்மாவின் உடல் நலனில் அக்கறை தேவை. பெண்கள் உண்ணும் உணவுகளில் கவனம் தேவை. வீட்டில் உள்ளவர்களிடம் பேசும் போது யோசித்து பேசவும். ராகு கேது சஞ்சாரத்தினால் பணவரவு அதிகரிக்கும். பெண்களுக்கு புதிய பொறுப்புகள் தேடி வரும். ராசியான நாட்கள் திங்கள், புதன், வெள்ளி, ராசியான எண்கள் 2,9.
துலாம்
அன்புள்ளம் கொண்ட துலாம் ராசிக்காரர்களே… இந்த வாரம் உங்கள் ராசிக்குள் சூரியன், சுக்கிரன் சஞ்சரிப்பதால் அரசு உதவி கிடைக்கும். சந்திரன் சஞ்சாரம் வார துவக்கத்தில் உற்சாகத்தை தந்தாலும் வார இறுதியில் மன கலக்கத்தை ஏற்படுத்தும். செவ்வாயின் சஞ்சாரம் இந்த வாரம் சாதகமாக உள்ளது. பூர்வீக சொத்துக்களை விற்க முயற்சி செய்யலாம். புதன், குரு ராசிக்கு 2வது வீட்டில் தன ஸ்தானத்தில் சஞ்சரிக்கின்றனர். பேசும் வார்த்தைகளினால் நன்மைகள் நடைபெறும், பேச்சில் இனிமை கூடும். சமூகத்தில் மதிப்பும் அதிகரிக்கும். சனியின் சஞ்சாரம் முயற்சியில் வெற்றியை தேடித்தரும். ராகு கேதுவினால் இந்த வாரம் மனைவியின் உடல் நலத்தில் கவனம் வைக்கவும். பிள்ளைகளையும் கண்காணிக்கவும். ராசியான நாட்கள் செவ்வாய், வியாழன், சனி. ராசியான எண்கள் 4,8.
விருச்சிகம்
செய்யும் செயலில் விட முயற்சியுடன் இருந்து வெற்றிக்கார போராடும் விருச்சிக ராசிக்காரர்களே. உங்கள் ராசிக்கு விரைய ஸ்தானத்தில் உள்ள சூரியன், சுக்கிரனால் இந்த வாரம் சுப விரைய செலவுகள் அதிகரிக்கும். சந்திரனின் சஞ்சாரம் வார துவக்கத்தில் சாதகமாக உள்ளது. மனதில் தெம்பும், தைரியமும் அதிகரிக்கும். செவ்வாயின் சஞ்சாரம் காரணமாக புதிய சொத்துக்களை வாங்க முயற்சி செய்யலாம். புதன், குரு ராசிக்குள் அமர்ந்திருப்பதால் செய்யும் முயற்சிகளில் வெற்றி கிடைக்கும். சொல்லும் சொல் வெல்லும். பண்டிகை நாட்களில் உண்ணும் உணவில் கவனம் தேவை. சனியின் சஞ்சாரம் இரண்டாம் வீட்டில் வாக்கு ஸ்தானத்தில் உள்ளது பணத்தை பத்திரமாக வைக்கவும். ராகு, கேது சஞ்சாரம் முயற்சிகளில் வெற்றியை தரும். கணவன் மனைவிக்குள் நெருக்கத்தை அதிகரிக்கச் செய்யும். பெண்களுக்கு இது சாதகமான வாரம். ராசியான தினங்கள் புதன், வெள்ளி. ராசியான எண்கள் 2, 7.
தனுசு
நேர்மையான குணம் கொண்ட தனுசு ராசிக்காரர்களே… இந்த வாரம் சூரியன், சுக்கிரன் சஞ்சாரத்தினால் செய்யும் தொழிலில் லாபம் அதிகரிக்கும். சந்திரனின் சஞ்சாரம் சாதகமாக உள்ளதால் மனதில் தைரியம் அதிகரிக்கும். செவ்வாயின் சஞ்சாரம் முயற்சி ஸ்தானத்திற்கு மாறுவதால் செயல்களில் வெற்றி கிடைக்கும். புதன், குருவின் சஞ்சாரம் விரைய ஸ்தானத்தில் உள்ளதால் பணத்தை பத்திரமாக வைத்துக்கொள்ளவும். விலை உயர்ந்த பொருட்களை யாருக்கும் இரவல் தர வேண்டாம். சுப விரைய செலவுகள் அதிகரிக்கும். செய்யும் செயலில் வெற்றி கிடைத்தாலும் சிலரது நடவடிக்கைகளினால் கோபப்படுவீர்கள். முன்யோசனையுடன் செயல்படுவது நல்லது. பெண்களுக்கு எதிர்பார்த்த இடத்தில் இருந்து உதவிகள் கிடைக்கும். ராசியான நாட்கள் திங்கள், வியாழன். ராசியான எண்கள் 6,9.
மகரம்
உழைப்பிற்கு மரியாதை தரும் மகரம் ராசிக்காரர்களே. ராசிக்கு 10 ஆம் வீட்டில் சூரியன் சுக்கிரன் உடன் இணைந்திருப்பதால் செய்யும் வேலையில் உற்சாகம் பிறக்கும். அலுவலகத்தில் இந்த வாரம் மதிப்பு, மரியாதை அதிகரிக்கும். பாக்கெட்டில் பணம் நிறையும். சந்திரனின் சஞ்சாரம் வார துவக்கத்தில் சாதகமாக இல்லை என்பதால் கவனமாக இருப்பது நல்லது. செவ்வாயின் சஞ்சாரம் ராசியில் இருந்து வாக்கு ஸ்தானத்திற்கு மாறுவதால் பேச்சில் கவனமாக இருப்பது அவசியம். சிலரது பேச்சுக்கள் கோபத்தை ஏற்படுத்தும் என்பதால் கவனமாக இருக்கவும். புதன், குருவின் சஞ்சாரம் ராசிக்கு லாப ஸ்தானத்தில் இருப்பதால் செய்யும் செயல்கள் நன்மையை தரும். பணம் வரும் வாய்ப்பும் அதிகம். சனியின் சஞ்சாரம் விரைய ஸ்தானத்தில் இருப்பதால் இந்த வாரம் உங்களுக்கு சுப விரைய செலவுகள் தேடி வரும். பண்டிகை காலம் என்பதால் செலவுகளும் பாக்கெட்டில் உள்ள பணத்தில் கவனமாக இருக்கவும். ராகு, கேது இந்த வாரம் அதிக நன்மையை தருவார். ராசியான தினம் ஞாயிறு, புதன். ராசியான எண்கள் 5,8. நவம்பர் 3 ஆம் தேதி வரை சந்திராஷ்டமம் நீடிப்பதால் கவனமாக இருப்பது நல்லது. ஆலய தரிசனம் செய்யலாம். மவுன விரதம் இருப்பது நல்லது.
கும்பம்
சூரியன், சுக்கிரன் ஒன்பதாமிடத்தில் இருக்கிறார் உத்தியோகத்தில் உயர் அதிகாரிகளின் ஒத்துழைப்பு கிடைக்கும், தொழில் நிமித்தம் அடிக்கடி வெளியூர் பயணம் செல்வீர்கள். குல தெய்வத்தின் அருள் கிடைக்கும். சந்திரனின் சஞ்சாரம் வார மத்தியில் சாதகமாக இல்லை என்பதால் கவனமாக இருப்பது நல்லது. செவ்வாய் உங்கள் ராசிக்கு 11வது வீட்டிற்கு லாப ஸ்தானத்திற்கு மாறுவதால் காரியம் வெற்றியடையும். புதன், குரு உங்கள் ராசிக்கு பத்தாமிடத்தில் இருக்கிறார் வெளிநாடு மூலம் வியாபார முன்னேற்றம் உண்டாகும், கமிஷன் தொழிலில் முன்னேற்றம் ஏற்படும். பணம் வருவாய் அதிகரிக்கும். சனி உங்கள் ராசிக்கு பதினொன்றாமிடத்தில் இருக்கிறார் மனதின் ஆசைகள் நிறைவேறும்.ராகு உங்கள் ராசிக்கு ஆறாமிடத்தில் இருக்கிறார் எதிரிகளை வெல்வீர்கள். கேது உங்கள் ஜென்ம ராசிக்கு பன்னிரெண்டாமிடத்தில் இருக்கிறார் கோயில்களுக்கு பிரயாணம் செல்வீர்கள். நவம்பர் 3 ஆம் தேதி தொடங்கி 6ஆம் தேதி காலை வரை சந்திராஷ்டமம் நீடிப்பதால் கவனம் தேவை. வாயை கொடுத்து வம்பில் மாட்டிக்கொள்ள வேண்டாம் ஆலய தரிசனம் செய்வது நன்மை தரும்.
மீனம்
சூரியன், சுக்கிரன் எட்டாமிடத்தில் இருக்கிறார்கள் விலை உயர்ந்த பொருட்களை பத்திரமாக பார்த்துக்கொள்ளவும். சந்திரனின் சஞ்சாரம் வார இறுதியில் சாதகமாக இல்லை. செவ்வாய் உங்கள் ராசிக்கு பனிரெண்டாம் வீட்டில் இருப்பதால் புதிதாக வீடுகட்டும் பணி துவங்க முயற்சி செய்யலாம். புதன், குரு உங்கள் ராசிக்கு ஒன்பதாமிடத்தில் இருக்கிறார் அதிர்ஷ்டம் அதிகரிக்கும், பொன்னகைகள் வாங்குவீர்கள். புத்திசாலித்தனம் அதிகரிக்கும். சனி உங்கள் ராசிக்கு பத்தாமிடத்தில் இருக்கிறார் செய்யும் தொழில் சிறப்படையும். ராகு உங்கள் ராசிக்கு ஐந்தாமிடத்தில் இருக்கிறார் உறவினர் வீட்டு விஷேசங்களில் பங்கேற்பீர்கள். உற்சாகம் களைகட்டும். கேது உங்கள் ராசிக்கு பதினொன்றாமிடத்தில் இருக்கிறார் மன ஆசைகள் நிறைவேறும். நவம்பர் 6 ஆம் தேதி முதல் 8 ஆம் தேதி வரை இரண்டு நாட்கள் சந்திராஷ்டமம். இந்த நாட்களில் வீண் பிரச்சினைகளில் தலையிட வேண்டாம். ஆலய தரிசனம் செய்வது நன்மை தரும்.
