ஒரு நல்ல காரியத்திற்காக கிறிஸ்துமஸ் தாத்தாவாக மாறிய அமெரிக்கா முன்னாள் அதிபர் ஒபாமாவுக்கு பல்வேறு தரப்பிலிருந்து பாராட்டுக்கள் குவிந்து வருகின்றன.
உலகம் முழுவதும் கிறிஸ்துமஸ் பண்டிகை கொண்டாட்டங்கள் களைக்கட்டத் தொடங்கியுள்ளன. அமெரிக்காவில் வெகு விமரிசையாக கொண்டாடப்படும் பண்டிகைகளில் கிறிஸ்துமஸ் முக்கியமான பண்டிகையாக கருதப்படுகிறது. இந்நிலையில், அமெரிக்காவில் உள்ள சில்ட்ரன்ஸ் நேஷனல் எனும் அமைப்பு புற்றுநோயால் பாதிக்கப்பட்ட குழந்தைகளுக்காக பிரத்யேகமான கிறிஸ்துமஸ் விழாவை ஏற்பாடு செய்திருந்தது.
கிறிஸ்துமஸ் கொண்டாட்டம் என்றாலே கிறிஸ்துமஸ் தாத்தாவும், டேஸ்டியான கேக்குகளும் தான் நினைவிற்கு வரும். அந்த வகையில், சில்ட்ரன்ஸ் நேஷனல் அமைப்பு நடத்திய கிறிஸ்துமஸ் கொண்டாட்டத்தில் அமெரிக்க முன்னாள் அதிபர் பாரக் ஒபாமா, கிறிஸ்துமஸ் தாத்தாவை போல் வேடமிட்டு புற்றுநோய் பாதித்த குழந்தைகளுக்கு விதவிதமான பரிசுகளை வழங்கி மகிழ்வித்தார்.
இது தொடர்பான வீடியோ ஒன்றை சில்ட்ரன்ஸ் நேஷனல் அமைப்பு தனது ட்விட்டர் பக்கத்தில் பகிர்ந்து, பாரக் ஒபாமாவிற்கு நன்றி தெரிவித்துள்ளது. அந்த ட்வீட்டில், ‘தங்களது குழந்தைகளை மகிழ்வித்த பாரக் ஒபாமாவிற்கு நன்றி. உங்களது திடீர் வருகையும், நீங்கள் அளித்த பரிசுகளும் புற்றுநோயால் பாதிக்கப்பட்ட குழந்தைகளின் முகத்தில் சந்தோஷத்தை உண்டாக்கியது. உங்களது பரிசுகள் அவர்களுக்கு மிகவும் பிடித்திருக்கிறது’ என்று குறிப்பிட்டுள்ளனர்.
