அரசியல் நோக்கத்துக்காக இலங்கைத் தமிழ் அகதிகளை இந்தியாவிலேயே வைத்திருக்க வேண்டும் என்ற முயற்சிகள் நடப்பதாக சமீபத்தில் இந்தியாவுக்கான இலங்கை உயர் ஆணையராக பொறுப்பேற்றுள்ள ஆஸ்டின் பெர்ண்டோ குற்றம்சாட்டியிருக்கிறார்.
இந்தியாவில் உள்ள இலங்கைத் தமிழ் அகதிகளை மீண்டும் இலங்கைக்கு வர வேண்டும் என விரும்புவதாகவும் அவர் தெரிவித்திருக்கிறார்.
இன்று தமிழ்நாட்டில் உள்ள 1 லட்சம் அகதிகளில் 20 முதல் 30% பேர் இந்தியாவிலேயே வசிக்க விரும்புவதாக கூறியுள்ள இலங்கை உயர் ஆணையர் ஆஸ்டின் பெர்னாண்டோ விரைவில் முகாம்களில் உள்ள அகதிகளை சந்திக்கயிருப்பதாக தெரிவித்திருக்கிறார்.
புதுதில்லியில் வெளிநாட்டு பத்திரிகையாளர் சங்கத்தில் பத்திரிகையாளர்களுடன் பேசிய ஆஸ்டின் பெர்னாண்டோ, “சுமார் 5,000 அகதிகள் இலங்கைக்கு திரும்பியுள்ளனர், இப்போது அகதிகள் அனைவரும் சொந்த ஊருக்குத் திரும்ப வேண்டும் என விரும்புகிறோம்,” எனக் கூறியிருக்கிறார்.
அம்மக்களை திரும்ப பெற்றுக் கொள்ள இலங்கை அரசு ஏதேனும் கால அளவை நிர்ணயித்துள்ளதா என்ற கேள்விக்கு, அது போன்ற எந்த கால அளவும் கிடையாது எனக் குறிப்பிட்டிருக்கிறார்.
அதே சமயம், அகதிகளை கூடிய விரைவில் திரும்பப் பெற்றுக்கொள்வோம் என்றும் இந்தியா மற்றும் இலங்கை இடையே அகதிகள் திரும்புவது தொடர்பான பேச்சுவார்த்தை நடக்க வேண்டும் என்றும் உயர் ஆணையர் சுட்டிக்காட்டியிருக்கிறார்.
1980களில் இலங்கையில் ஏற்பட்ட இனக்கலவரத்தினாலும் போரின் காரணமாகவும் சுமார் 3 லட்சம் ஈழத்தமிழர்கள் தமிழ்நாட்டிற்கு . அதில் சுமார் 70 ஆயிரம் அகதிகள் முகாம்களிலும் 30 ஆயிரம் அகதிகள் முகாம்களுக்கு வெளியிலும் தமிழ்நாட்டில் வாழ்ந்து வருகின்றனர்.
ஆஸ்டன் பெர்னாண்டோ இதற்கு முன்னதாக, இலங்கை ஜனாதிபதி மைத்திரிபால சிறிசேனாவின் செயலாளராக பணியாற்றியிருக்கிறார். அதற்கு முன்பு, இலங்கை மறுவாழ்வு, பொது நிர்வாகம், உள்துறை, மாகாண கவுன்சல்கள் துறையின் செயலாளராகவும் இவர் பணியாற்றியுள்ளார்.
கடந்த காலங்களில், முன்னாள் தமிழக முதலமைச்சரும் அதிமுக பொதுச் செயலாளருமான ஜெயலலிதா அகதிகளை திருப்பி அனுப்பும் இந்திய அரசின் முடிவுக்கு எதிர்ப்பு தெரிவித்திருந்தார். அதே போல் திமுகவும் அவ்வாறான முயற்சிக்கு எதிர்ப்பு தெரிவித்திருந்தமை இங்கு குறிப்பிடத்தக்கது.
