வயதான காலத்தில் உணவுக்கு கூட மகன்களிடம் முறை வைத்து சாப்பிடுவது மனவேதனை ஏற்படுத்தியதால் தாய் தற்கொலை செய்து கொண்டது சோகத்தை ஏற்படுத்தியுள்ளது.
தேனி மாவட்டத்தை சேர்ந்த பெரிய கருப்பன், பாண்டியம்மாள்(58) தம்பதியினருக்கு இரண்டு மகன்கள் உள்ளனர். இவர்கள் இவருக்கும் திருமணமாகி தனிக்குடித்தனம் சென்றுவிட்டதால் தம்பதியினர் இருவரும் தனியாக வசித்து வந்துள்ளனர்.
இதற்கிடையில் வயதாகிவிட்டதால் வேலைக்கு செல்ல முடியாத சூழ்நிலை, இதனால் ஒரு வாரத்திற்கு பெரிய மகனிடமும், மற்றொரு வாரத்திற்கு இளைய மகனிடமும் சாப்பிட்டு வந்துள்ளார்கள்.
பெற்றெடுத்த பிள்ளைகள் வாரம் ஒரு முறை என முறை வைத்து உணவு கொடுத்து வந்தது, பாண்டியம்மாளுக்கு மன வருத்தத்தை ஏற்படுத்தியுள்ளது. இதற்கிடையில், நேற்று பாண்டிம்மாளுக்கு பயங்கரமாக பசி எடுத்துள்ளது, இதனால் தனது மூத்த மகன் செல்வம் வீட்டுக்கு சென்றுள்ளார்.
அப்போது வீட்டில் யாரும் இல்லை என்று கூறப்படுகிறது. இதனால் விரக்தியடைந்த அவர், வீட்டில் இருந்த மண்எண்ணெயை எடுத்து தனது உடலில் ஊற்றி தீ வைத்து கொண்டார்.
உடல் முழுவதும் தீ பரவியதால் அலறி துடித்தார். சத்தம் கேட்டு அக்கம்பக்கத்தினர் ஓடி வந்து அவரை மீட்டு சிகிச்சைக்காக தேனி அரசு மருத்துவக்கல்லூரி மருத்துவமனையில் சேர்த்தனர்.
அங்கு அவருக்கு தீவிர சிகிச்சை அளிக்கப்பட்டது. எனினும் சிகிச்சை பலனின்றி அவர் பரிதாபமாக இறந்துள்ளார்.
