இந்திய முன்னாள் ஜனாதிபதி அப்துல் கலாமின் நினைவாக கேரளாவில் அமைக்கப்பட்டுள்ள அருங்காட்சியகம் இன்று (வியாழக்கிழமை) திறந்து வைக்கப்படவுள்ளது.
திருவனந்தபுரத்தில் அமைக்கப்பட்டுள்ள இந்த அருங்காட்சியகத்தை இந்திய விண்வெளி ஆராய்ச்சி நிறுவனமான இஸ்ரோவின் முன்னாள் தலைவர் ராதாகிருஷ்ணன் திறந்து வைக்கிறார். மேலும், விக்ரம் சாராபாய் விண்வெளி ஆராய்ச்சி மையத்தின் இயக்குனர் கே.சிவன் மற்றும் கேரளா சட்ட சபையின் துணை சபாநாயகர் வி.சசி ஆகியோர் நிகழ்வில் பங்கேற்கவுள்ளனர்.
விண்வெளி ஆராய்ச்சியாளராக அப்துல்கலாமின் கோட்பாடுகளை பிரபலப்படுத்தும் கலாநிதி கலாம் ஸ்மிருதி இண்டர்நேஷனல் மூலம் அமைக்கப்பட்டுள்ள இந்த அருங்காட்சியகத்திற்கு, ‘கலாநிதி கலாம் ஸ்மிருதி சர்வதேச அறிவியல் மற்றும் விண்வெளி அருங்காட்சியகம்’ என பெயரிடப்பட்டுள்ளது.
இளைஞர்கள் மத்தியில் அவர்களுடைய எதிர்காலம் குறித்த விழிப்புணர்வை ஏற்படுத்திய அப்துல் கலாமின் அரிய ஒளிப்படங்கள், ரொக்கெட் மற்றும் செயற்கோளின் மாதிரி வடிவங்கள் மற்றும் அவருடைய எழுச்சியூட்டும் வாசகங்கள் போன்றவை அருங்காட்சியகத்தில் இடம் பெற்றுள்ளன.
